Wizara ya Elimu, Sayansi na Teknolojia mnamo, Juni 2, 2022 imejadili rasimu ya maboresho ya mitaala iliyotokana na maoni ya wadau mbalimbali juu ya uboreshaji wa mitaala ya elimu nchini ikiwa ni maandalizi ya Kongamano la Elimu la siku tatu la kukusanya maoni ya wadau.

Katibu Mkuu Wizara ya Elimu, Sayansi na Teknolojia Prof. Eliamani Sedoyeka alisema kuwa lengo kubwa la uboreshaji huo wa mitaala ni kutekeleza maelekezo ya Mhe. Samia Suluhu Hassan, Rais wa Jamhuri ya Muungano wa Tanzania aliyoyatoa kwamba mitaala ya elimu ilenge kuwaandaa vijana wa Kitanzania wenye ujuzi, uwezo wa kuzalisha mali na kujitegemea baada ya kumaliza ngazi yoyote ya elimu.

Mkutano huo uliofanyika Jijini Dodoma, uliwashirikisha Wajumbe kutoka Wizara ya Elimu, Sayansi na Teknolojia, Wizara ya Elimu na Mafunzo ya Amali Zanzibar iliyowakilishwa na Katibu Mkuu Ally Khamis Juma, Ofisi ya Rais TAMISEMI iliyowakilishwa na Naibu Katibu Mkuu Elimu, Dkt. Charles Msonde.

Washiriki wengine ni Wizara ya Maendeleo ya Jamii, Jinsia, Watoto na Makundi Maalumu iliyowakilishwa na Amon Mpanju, Naibu Katibu Mkuu, Taasisi ya Elimu Tanzania (TET) iliyowakilishwa na Mkurugenzi Mkuu, Dkt. Aneth Komba, Taasisi ya Elimu Zanzibar (TEZ) iliyowakilishwa na Mkurugenzi Mkuu Bwana. Abdallah Mohamed Mussa na Kamati ya Kitaifa ya Mitaala iliyowakilishwa na Prof. Makenya Maboko.