Taasisi ya Elimu Tanzania (TET) tarehe 18 na 19/04/2023 imekabidhi vifaa vya kielektroniki kutoka nchini Korea kupitia mradi wa KLIC 2022 (Korean e-learning Improvement Cooperation 2022) pamoja na uzinduzi wa maabara ya TEHAMA kwa shule ya Msingi Tegeta A na Shule ya Sekondari Kimbiji za jijini Dar es salaam.

KLIC 2022 ni programu ya mafunzo yaliyotolewa na nchi ya Korea kwa kushirikiana na Taasisi ya Elimu Tanzania (TET) kwa njia ya mtandao kwa walimu 40 wa shule ya msingi Tegeta A na Shule ya Sekondari Kimbiji.

Akikabidhi vifaa hivyo, Mkurugenzi Mkuu wa TET Dkt. Aneth A.Komba amemshukuru Rais wa Jamhuri ya Muungano wa Tanzania,Dkt.Samia Suluhu Hassan kwa kuendelea kuboresha sekta ya Elimu nchini, ambapo ameeleza kuwa walimu katika shule hizo wataweza kutekeleza kwa urahisi kazi ya ufundishaji na ujifunzaji kwa njia ya kieletroniki.

Dkt. Komba amewataka walimu hao kuhakikisha wanaleta matokeo chanya ambayo yatasaidia katika uboreshaji wa elimu.

"Mkayatumie mafunzo vizuri na vifaa hivyo mlivyokabidhiwa kwa kuleta matokeo chanya na tuone ongezeko la ufaulu kwa wanafunzi, Amesema Dkt.Komba.

Tukio hilo liliambatana na kukabidhi vishikwambi 40 kwa walimu walioshiriki programu ya mafunzo hayo.